“ವಿದ್ಯಾರ್ಥಿಗಳ ವೈಜ್ಞಾನಿಕ ಕೃಷಿ ಜ್ಞಾನದ ಜೊತೆಗೆ ರೈತರ ಕೃಷಿಯೊಂದಿಗಿನ ಅನುಭವದ ಮಾಹಿತಿ ಜೊತೆಗೂಡಿದಾಗ ಕೃಷಿ ವಿದ್ಯಾರ್ಥಿಗಳು ಪರಿಪೂರ್ಣರಾಗುತ್ತಾರೆ” ಎಂದು ಕಲಗೋಡು ರತ್ನಾಕರ್ ಹೇಳಿದರು.
ಕೆಳದಿ ಶಿವಪ್ಪ ನಾಯಕ ಕೃಷಿ ಮತ್ತು ತೋಟಗಾರಿಕೆ ವಿಜ್ಞಾನಗಳ ವಿಶ್ವವಿದ್ಯಾಲಯ ಇರುವಕ್ಕಿ ,ಕೃಷಿ ಇಲಾಖೆ ಹೊಸನಗರ, ಗ್ರಾಮ ಪಂಚಾಯಿತಿ ಕೋಡೂರು, ಮಾರುತಿಪುರ, ರಿಪ್ಪನ್ ಪೇಟೆ, ಚಿಕ್ಕಜೇನಿ ಇವರ ಸಂಯುಕ್ತ ಆಶ್ರಯದಲ್ಲಿ ಗ್ರಾಮೀಣ ಕೃಷಿ ಕಾರ್ಯಾನುಭವ ಶಿವರದಡಿಯಲ್ಲಿ ವಿದ್ಯಾರ್ಥಿಗಳು ಗ್ರಾಮೀಣ ಮಟ್ಟದಲ್ಲಿ ಹಮ್ಮಿಕೊಂಡಿದ್ದ ” ಕೃಷಿ ಮೇಳ “ಉದ್ಘಾಟಿಸಿ ಮಾತನಾಡಿ “ವಿದ್ಯಾರ್ಥಿಗಳು ಹೊಸ ತಂತ್ರಜ್ಞಾನಗಳನ್ನು ಕಂಡುಹಿಡಿದು ಕೃಷಿ ಚಟುವಟಿಕೆಗಳನ್ನ ವಿಸ್ತರಣೆ ಮಾಡಬೇಕಿದೆ. ಮಲೆನಾಡಿ ಭಾಗದಲ್ಲಿರುವ ರೈತರು ಫಲವತ್ತಾದ ಭೂಮಿ, ನೀರನ್ನು ಸಮರ್ಪಕವಾಗಿ ಉಪಯೋಗಿಸಿಕೊಂಡು ಆದಾಯ ದ್ವಿಗುಣಗೊಳಿಸಬೇಕಿದೆ.ವಾಣಿಜ್ಯ ಬೆಳೆಯಿಂದಾಗಿ ಸಿರಿಧಾನ್ಯಗಳನ್ನು ಬೆಳೆಯುವುದು ತೀರಾ ಕಡಿಮೆಯಾಗಿದೆ, ಸಿರಿಧಾನ್ಯಗಳನ್ನು ಬೆಳೆದು ಅವುಗಳನ್ನು ಸಂಗ್ರಹಿಸುವುದು ಹಾಗೂ ಮಣ್ಣಿನ ಫಲವತ್ತತೆಯನ್ನು ಕಾಪಾಡುವುದು ಅವಶ್ಯಕವಾಗಿದೆ” ಎಂದು ಕಲಗೋಡು ರತ್ನಾಕರ್ ಮಾಜಿ ಅಧ್ಯಕ್ಷರು ಜಿಲ್ಲಾ ಪಂಚಾಯಿತ್ ಶಿವಮೊಗ್ಗ ಹೇಳಿದರು.
ಇತ್ತೀಚಿನ ಕೃಷಿ ಮಾಹಿತಿಯನ್ನು ಒದಗಿಸಿ, ಹೊಸ ವೈಜ್ಞಾನಿಕ ಮತ್ತು ಲಾಭದಾಯಕ ಅಭ್ಯಾಸವನ್ನು ಅಳವಡಿಸಿಕೊಳ್ಳಲು ರೈತರಿಗೆ ಮಾರ್ಗದರ್ಶನ/ಪ್ರೇರೇಪಿಸುವುದು ಕೃಷಿಮೇಳದ ಉದ್ದೇಶವಾಗಿದೆ.
ಹೆಚ್ಚು ಇಳುವರಿ ನೀಡುವ ತಳಿಗಳು ಔಷಧೀಯ ಮತ್ತು ಸುಗಂಧಯುಕ್ತ ಸಸ್ಯಗಳು ಕೃಷಿ ಚಟುವಟಿಕೆ ಸುಲಭ ಮಾಡುವ ಹೊಸ ಯಂತ್ರೋಪಕರಣಗಳು ಸಿರಿಧಾನ್ಯಗಳ ಮಹತ್ವ ತಿಳಿಸುವ ಚಿತ್ರಗಳು ಸಮಗ್ರ ಕೃಷಿ ಮಾದರಿಗಳು ನೂತನ ಕೃಷಿ ತಂತ್ರಜ್ಞಾನ ಮಾಹಿತಿ ಹೀಗೆ ಹಲವಾರು ಆಕರ್ಷಕ ಮಳಿಗೆಗಳಿಂದ ಕೃಷಿಮೇಳ ರೈತರನ್ನು ತನ್ನತ್ತ ಕೈಬೀಸಿ ಕರೆಯುತ್ತಿತ್ತು.
“ಕೃಷಿ ವಿಶ್ವವಿದ್ಯಾಲಯ ವಿದ್ಯಾರ್ಥಿಗಳಿಗೆ ಬೋಧನೆಯ ಜೊತೆಗೆ ಪ್ರಾಯೋಗಿಕ ಜ್ಞಾನವನ್ನು ಒದಗಿಸುತ್ತದೆ. ರೈತರು ಸಾಂಪ್ರದಾಯಿಕವಾಗಿ ಕೃಷಿ ಪದ್ಧತಿ ಅನುಸರಿಸುತ್ತಿದ್ದು, ಹೊಸ ತಂತ್ರಜ್ಞಾನಗಳನ್ನು ಬಳಸಿಕೊಂಡು ಸಮಗ್ರ ಕೃಷಿ ಪದ್ಧತಿ ಅಳವಡಿಸಿಕೊಳ್ಳಬೇಕು. ಕೃಷಿಯ ಜ್ಞಾನದ ಕೊರತೆಯಿಂದಾಗಿ ಹೆಚ್ಚು ಉತ್ಪಾದನೆ ಖರ್ಚನ್ನು ಭರಿಸುತ್ತಿದ್ದು, ಕೃಷಿಯ ವ್ಯವಸ್ಥಿತ ಜ್ಞಾನವನ್ನು ಕೃಷಿ ವಿಶ್ವವಿದ್ಯಾಲಯದಿಂದ ಪಡೆದು ಖರ್ಚನ್ನು ಕಡಿಮೆ ಮಾಡಿ ಆದಾಯ ದ್ವಿಗುಣಗೊಳಿಸಬೇಕು” ಎಂದು ಕೃಷಿ ವಿವಿಯ ಕುಲಸಚಿವರು ಹಾಗೂ ವಿಶೇಷಾಧಿಕಾರಿ ಡಾ.ಕೆ.ಸಿ ಶಶಿಧರ್ ತಿಳಿಸಿದರು.
ಕೃಷಿ ವಿವಿಯ ವಿಜ್ಞಾನಿಗಳೊಂದಿಗೆ ರೈತರ ಸಂವಾದ ಏರ್ಪಡಿಸಲಾಗಿತ್ತು .
ಅಡಿಕೆ ಸಿಪ್ಪೆಯನ್ನು ಹೇಗೆ ಮರುಬಳಕೆ ಮಾಡಬಹುದು? ಎಂಬುದರ ರೈತರ ಪ್ರಶ್ನೆಗೆ ಉತ್ತರಿಸಿದ ಡಾ.ಸ್ವಾತಿ
ಅಡಿಕೆ ಸಿಪ್ಪೆಯನ್ನು ರೈತರು ರಸ್ತೆಯಲ್ಲಿ ಎಸೆಯುತ್ತಿದ್ದಾರೆ. ಅಡಿಕೆ ಸಿಪ್ಪೆಯನ್ನು ಸ್ವಲ್ಪ ದಿನಗಳ ಕಾಲ ಒಣಗಿಸಿ ಮೈಕ್ರೋಬಿಯಲ್ ಕಲ್ಚರ್ ಹಾಕಿ, ಉತ್ಕೃಷ್ಟ ಗೊಬ್ಬರವನ್ನು ತಯಾರಿಸಬಹುದು. ಅಡಿಕೆ ಸಿಪ್ಪೆ ಗೊಬ್ಬರದಲ್ಲಿ ಪೋಟಾಸ್ ಅಂಶ ಹೆಚ್ಚಾಗಿರುತ್ತದೆ. ಗೊಬ್ಬರವನ್ನು ಅಡಿಕೆಗೆ ಹಾಕುವಾಗ ಬುಡದಿಂದ ಒಂದುವರೆ ಅಡಿ ದೂರದಲ್ಲಿ ಪಾಥಿಯನ್ನು ಮಾಡಿ ಗೊಬ್ಬರವನ್ನು ಹಾಕಿ, ನಂತರ ಮೇಲೆ ಮಣ್ಣನ್ನು ಮುಚ್ಚಬೇಕು.
ಪಾಥಿಯನ್ನು ಮಾಡುವಾಗ ಬೇರುಗಳಿಗೆ ಹಾನಿಯಾಗದಂತೆ ನೋಡಿಕೊಳ್ಳಬೇಕು ಎಂದು ಅಡಿಕೆ ಸಂಶೋಧನಾ ಕೇಂದ್ರದ ವಿಜ್ಞಾನಿ ಡಾ.ಸ್ವಾತಿ ಹೇಳಿದರು.
ಅಡಿಕೆಯಲ್ಲಿ ಅಂತರ ಬೆಳೆಯಾಗಿ ಕಾಳುಮೆಣಸನ್ನು ಬೆಳೆದಾಗ ಶಿಫಾರಸ್ಸಿನ ಗೊಬ್ಬರವನ್ನು ಅಡಿಕೆಗೆ ಹಾಗೂ ಕಾಳುಮೆಣಸಿಗೆ ಬೇರೆ ಬೇರೆಯಾಗಿ ನೀಡಬೇಕು. ಇದರಿಂದಾಗಿ ಗಿಡಗಳ ಮಧ್ಯೆ ಗೊಬ್ಬರ ಹಾಗೂ ನೀರಿಗೆ ಸ್ಪರ್ಧೆ ನಡೆಯುವುದಿಲ್ಲ. ಕೊಟ್ಟಿಗೆ ಗೊಬ್ಬರವನ್ನು ಹಾಕುವುದರ ಜೊತೆಗೆ ಸ್ವಲ್ಪ ಪ್ರಮಾಣದ ಟ್ರೈಕೋ ಡರ್ಮವನ್ನು ಮಿಶ್ರಣ ಮಾಡಿ ಹಾಕುವುದು ಸೂಕ್ತ .
ಕೋಡೂರು ಗ್ರಾಮದ ರೈತರಾದ ರಾಘವೇಂದ್ರ ಅವರು ತಮ್ಮ ತೋಟದಲ್ಲಿ ಹಿಡಿಮುಂಡಿಗೆ ರೋಗವು ಹೆಚ್ಚಾಗಿದ್ದು ಇಳುವರಿ ಕುಂಠಿತಗೊಂಡಿದೆ ಎಂಬ ಸಮಸ್ಯೆಗೆ ಉತ್ತರಿಸಿದ ಅಡಿಕೆ ಸಂಶೋಧನಾ ಕೇಂದ್ರದ ತಜ್ಞರಾದ ಡಾ.ಸ್ವಾತಿ ಅವರು ಮಾತನಾಡಿ “ಭತ್ತದ ಗದ್ದೆಯನ್ನು ಅಡಿಕೆ ತೋಟವನ್ನಾಗಿ ಪರಿವರ್ತಿಸಿದ ಜಾಗದಲ್ಲಿ ಹಿಡಿಮುಂಡಿಗೆ ಹೆಚ್ಚಾಗಿ ಕಂಡು ಬರುತ್ತದೆ ಹಾಗೂ ಬೇರೆ ಮುಣ್ಣನ್ನು ತಂದು ಹಾಕುವುದರಿಂದ, ಜಿಂಕ್ ಹಾಗೂ ಬೊರಾನ್ ಪೋಷಕಾಂಶಗಳ ಕೊರತೆ ಇರುವ ತೋಟದಲ್ಲಿ ಹಿಡಿಮುಂದಿಗೆ ರೋಗ ಹೆಚ್ಚಾಗಿ ಕಂಡುಬರುತ್ತದೆ ಎಂದು ಕಾರಣಗಳನ್ನು ತಿಳಿಸಿದರು. ಎಲೆಗಳು ಚಿಕ್ಕದಾಗಿದ್ದು, ಗೆಣ್ಣುಗಳ ಅಂತರ ಕಡಿಮೆಯಾಗುತ್ತದೆ. ಮರವು ಅಡಿಕೆಯನ್ನು ಬಿಡಲು ವಿಫಲವಾಗುತ್ತದೆ ಎಂದು ರೋಗದ ಲಕ್ಷಣಗಳನ್ನು ತಿಳಿಸಿದರು. ಹಿಡಿ ಮುಂಡಿಗೆಯನ್ನು, ಎರಡು ಗಿಡಗಳ ಮಧ್ಯೆ ಎರಡು ಅಡಿ ಆಳದ ಬಸಿಗಾಲಿಗೆಗಳನ್ನು ಮಾಡಬೇಕು ಹಾಗೂ ಅದನ್ನು ಸ್ವಚ್ಛಗೊಳಿಸುತ್ತಾ ಇರಬೇಕು. ನೀರು ಗಿಡಗಳಿಗೆ ಅವಶ್ಯಕತೆಗಳಿಗುಣವಾಗಿ ನೀಡಬೇಕು ಹಾಗೂ ಮಣ್ಣಿಗೆ ಕಾಪರ್ ಸಲ್ಪೇಟ್ ಮತ್ತು ಸುಣ್ಣವನ್ನು ಹಾಕುವುದರ ಮೂಲಕ ನಿರ್ವಹಣೆ ಮಾಡಬಹುದು. ಜೊತೆಗೆ ಟ್ರೈಕೋಡರ್ಮ ಜೈವಿಕ ಗೊಬ್ಬರವನ್ನು ಗೊಬ್ಬರದ ಜೊತೆಗೆ ಮಿಶ್ರಣ ಮಾಡಿ ಹಾಕಬೇಕು” ಎಂದು ಸಲಹೆ ನೀಡಿದರು .