ಯೋಗಾಭ್ಯಾಸದಿಂದ ಮನಸ್ಸು-ದೇಹಾರೋಗ್ಯಕ್ಕೆ ಹಿತ

ಯೋಗ ಅಭ್ಯಾಸ ಮಾಡುವುದು ಬಹಳ ಮುಖ್ಯ. ಅದು ಕೇವಲ ನಮ್ಮ ದೈಹಿಕ ಆರೋಗ್ಯದ ದೃಷ್ಠಿಯಿಂದ ಮಾತ್ರವಲ್ಲದೆ ಮಾನಸಿಕ ಆರೋಗ್ಯವನ್ನು ಸುಧಾರಿಸಲು ಒಂದು ಉತ್ತಮ ಮಾರ್ಗವಾಗಿದೆ.
    ಮನುಷ್ಯ ಆಧುನಿಕ ಜಗತ್ತಿನಲ್ಲಿ ದಿನನಿತ್ಯದ ಜೀವನವನ್ನು ಯಾಂತ್ರಿಕವಾಗಿ ಕಳೆಯುತ್ತಿದ್ದು ಮಾನಸಿಕ ನೆಮ್ಮದಿ ಪಡೆದುಕೊಳ್ಳಲು ಅನ್ಯಮಾರ್ಗಗಳಿಗೆ ಒಳಗಾಗುತ್ತಿದ್ದಾನೆ. ಆದರೆ ನಮ್ಮ ಸಂಪ್ರದಾಯದಲ್ಲಿಯೇ ಬಂದಿರುವ ಯೋಗವನ್ನು ಅಭ್ಯಾಸ ಮಾಡಲು ನಿಯಮಿತವಾಗಿ ಸಮಯ ಮೀಸಲು ಇಟ್ಟರೆ ಉತ್ತಮ ಆರೋಗ್ಯವನ್ನು ಹೊಂದಲು ಸಾಧ್ಯವಾಗುತ್ತದೆ.
     ಯೋಗಭ್ಯಾಸ ಭಾರತೀಯ ಸಂಸ್ಕøತಿಯ ಒಂದು ಅಮೂಲ್ಯವಾದ ಕೊಡುಗೆ ಎಂದು ಹೇಳಿದರೆ ತಪ್ಪಾಗಲಾರದು. ನಮ್ಮ ಪೂರ್ವಜರು ನಮಗೆ ಅನೇಕ ವಿಚಾರವನ್ನು ಮತ್ತು ರೂಢಿಗಳನ್ನು ಬಿಟ್ಟು ಹೋಗಿದ್ದಾರೆ. ಅದರಲ್ಲಿ ಈ ಯೋಗಾಸನ ಕೂಡ ಒಂದು. ಯೋಗದ ನಿಯಮಿತ ಅಭ್ಯಾಸವು ದೇಹ ಮತ್ತು ಆತ್ಮವನ್ನು ಶುದ್ದಿಗೊಳಿಸುತ್ತವೆ ಎಂದು ನಮ್ಮ ಪೂರ್ವಜರು ಸಂಪೂರ್ಣವಾಗಿ ನಂಬಿದ್ದರು.
       ಭಾರತದಲ್ಲಿ ಯೋಗವು ವೇದಗಳ ಪೂರ್ವ ಹಾಗೂ ವೇದಗಳ ಕಾಲದಲ್ಲಿ ಅಸ್ತಿತ್ವ ಇರುವ ಉಲ್ಲೇಖಗಳನ್ನು ನಾವು ನೋಡಬಹುದು. ಯೋಗದ ಇತಿಹಾಸದಲ್ಲಿ 2000 ವರ್ಷಗಳ ಅವಧಿಯು ಉಪನಿಷತ್ತುಗಳಿಂದ ಪ್ರಧಾನವಾಗಿದೆ. ಇದರಲ್ಲಿ ವೈದಿಕ ಸಾಹಿತ್ಯದ ಅರ್ಥಗಳನ್ನು ವಿವರಿಸಲಾಗಿದೆ. ದೇಹ ಮತ್ತು ಮನಸ್ಸು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದನ್ನು ಆಧ್ಯಾತ್ಮಿಕ ಬೋಧನೆಯ ಮೂಲಕ ತಿಳಿಸಲಾಗಿದೆ. 108 ಲಿಖಿತ ದಾಖಲೆಗಳಲ್ಲಿ 20 ಯೋಗ ಉಪನಿಷತ್ತುಗಳಿವೆ. ಇವುಗಳಲ್ಲಿ ಪ್ರಾಣಾಯಾಮ, ಪ್ರತ್ಯಾಹಾರ, ಸಮನ್ವಯತೆ ವಿಭಿನ್ನ ಯೋಗ ತಂತ್ರಗಳ ಮೇಲೆ ಕೇಂದ್ರೀಕರಿಸುವ ಮೂಲಕ ವ್ಯಕ್ತಪಡಿಸಿದ್ದಾರೆ.
      ಯೋಗಗಳಲ್ಲಿ ಹಠ ಯೋಗ, ವಿನ್ಯಾಸ ಯೋಗ, ಅಷ್ಟಾಗ ಯೋಗ, ಪವರ್ ಯೋಗ, ಬಿಕ್ರಮ ಯೋಗ, ಜೀವಮುಕ್ತಿ ಯೋಗ, ಅಯ್ಯಂಗಾರ್ ಯೋಗ, ಅನುಸರ ಯೋಗ, ಶಿವಾನಂದ ಯೋಗ, ವಿನಿಯೋಗ, ಕುಂಡಲಿನಿ ಯೋಗ, ಯಿನ್‍ಯೋಗ ಎಂಬ ಹಲವು ವಿಧಗಳನ್ನು ನೋಡಬಹುದು.
ಯೋಗದ ಉಪಯೋಗ:
     ಯೋಗದ ಉಪಯೋಗಗಳನ್ನು ನೊಡುವುದಾದರೆ ಯೋಗದ ಆಸನಗಳು ಐಸೋ ಮೆಟ್ರಿಕ್ ಅಂದರೆ ಕೆಲವು ಸೆಕೆಂಡುಗಳಿಂದ ಹಲವಾರು ನಿಮಿಷಗಳವರೆಗೆ ಸ್ನಾಯುವಿನ ಒತ್ತಡವನ್ನು ಹಿಡಿದುಕೊಳ್ಳುತ್ತವೆ. ಇದು ಹೃದಯ ರಕ್ತನಾಳಗಳ ಆರೋಗ್ಯ ಮತ್ತು ರಕ್ತ ಪರಿಚಲನೆಯನ್ನು ಸುಧಾರಿಸುತ್ತದೆ. ಹಾಗೂ ನಿಯಮಿತ ಯೋಗ ಅಭ್ಯಾಸವು ರಕ್ತದ ಒತ್ತಡವನ್ನು ಕಡಿಮೆ ಮಾಡುತ್ತದೆ.
     ಸುಧಾರಿತ ರಕ್ತ ಪರಿಚಲನೆ ಮತ್ತು ಸುತ್ತಮುತ್ತಲಿನ ಸ್ನಾಯುಗಳ ಮಸಾಜ್ ಪರಿಣಾಮವು ಸಾಮಾನ್ಯ ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ ಮತ್ತು ಉತ್ತೇಜಿಸುತ್ತದೆ. ಕೀಲುಗಳ ಚಲನಶೀಲತೆಯನ್ನು ಉತ್ತೇಜಿಸುತ್ತದೆ ಮತ್ತು ಒತ್ತಡವನ್ನು ಕಡಿಮೆ ಮಾಡುತ್ತದೆ. ಮೃದುವಾದ ಹಿಗ್ಗಿಸುವಿಕೆಯು ಸ್ನಾಯು, ಜಂಟಿ ಒತ್ತಡವನ್ನು ಮತ್ತು ಬಿಗಿತವನ್ನು ಸಡಿಲಗೊಳಿಸಿ ಅನುಕೂಲ ಮಾಡಿಕೊಡುತ್ತದೆ. ನಿರಂತರ ಬೆನ್ನು ನೋವಿಗೆ ಉಪಶಮನ ಒದಗಿಸುತ್ತದೆ. ವಿಶ್ರಾಂತಿಯನ್ನು ನೀಡುತ್ತದೆ, ಜೊತೆಗೆ ಉತ್ತಮ ನಿದ್ರೆ ಮಾಡಲು ಕೂಡ ಅನುಕೂಲ ಮಾಡಿಕೊಡುತ್ತದೆ.
       ನಿರಂತರ ಯೋಗಾಭ್ಯಾಸವು ನಕಾರಾತ್ಮಕ ಭಾವನೆಗಳಿಂದ ದೂರವಿರಲು ಸಹಾಯ ಮಾಡುತ್ತದೆ. ರಾಷ್ಟ್ರೀಯ ಆರೋಗ್ಯ ಸಂಸ್ಥೆಗಳ ಪ್ರಕಾರ ಯೋಗವು ಒತ್ತಡ ನಿರ್ವಹಣೆ, ಸಾವಧಾನತೆ, ಆರೋಗ್ಯಕರ ಆಹಾರ ಮತ್ತು ತೂಕ ನಷ್ಟಗಳಂತಹ ಆರೋಗ್ಯ ಕಾರಕಗಳನ್ನು ಬೆಂಬಲಿಸುತ್ತದೆ ಎಂದು ವೈಜ್ಞಾನಿಕ ಪುರಾವೆಗಳನ್ನು ತೋರಿಸುತ್ತದೆ. ಯೋಗ ತರಗತಿಗಳಿಗೆ ಹೋಗುವುದರ ಮೂಲಕ ಹಾಗೂ ಉತ್ತಮ ವಾತಾವರಣದಲ್ಲಿ ಅಭ್ಯಾಸ ಮಾಡುವುದರಿಂದ ಸಾರ್ವಜನಿಕವಾಗಿ ಸಹ ತೊಡಗಿಕೊಳ್ಳಬಹುದು. ಯೋಗವು ಮಕ್ಕಳಲ್ಲಿ ಬುದ್ಧಿ ಶಕ್ತಿಯನ್ನು ಹೆಚ್ಚಿಸುತ್ತದೆ. ಚಂಚಲ ಮನಸ್ಸನು ಹಿಡಿತದಲ್ಲಿ ಇಟ್ಟುಕೊಳ್ಳಲು ಸಹಾಯ ಮಾಡುತ್ತದೆ, ಹೀಗೆ ಅನೇಕ ತರಹದ ಉಪಯೋಗಗಳನ್ನು ನಾವು ಯೋಗ ಮಾಡುವುದರಿಂದ ಪಡೆದುಕೊಳ್ಳಬಹುದು.
      ಯಾವುದೇ ರೀತಿಯ ವಯಸ್ಸಿನ ಮಿತಿ ಇಲ್ಲದೆ ಪ್ರತಿಯೊಬ್ಬರು ತಮ್ಮ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಯೋಗ ಮಾಡಬಹುದು. ದಿನನಿತ್ಯ ಯೋಗಾಭ್ಯಾಸ ಮಾಡುವುದು ಜೀವನದಲ್ಲಿ ಒಂದು ಹೊಸ ಹುರುಪನ್ನು ನೀಡುತ್ತದೆ. ಪ್ರಸ್ತುತ ದಿನಗಳಲ್ಲಿ ಜನರು ಒಳ್ಳೆಯ ವಿಚಾರದ ಕಡೆಗೆ ಗಮನ ಹರಿಸುವುದು ಹೆಚ್ಚಾಗುತ್ತಿದೆ. ಜೊತೆಗೆ ಯಾವುದೇ ಅಭ್ಯಾಸ ಬೇಗನೆ ಫಲಿತಾಂಶ ನೀಡಬೇಕೆಂದು ಬಯಸುತ್ತಾರೆ. ಹಾಗಾಗಿ ಯೋಗದ ಕಡೆ ಒಲವು ಕಡಮೆ. ಆದರೆ  ಯೋಗದ ಅಭ್ಯಾಸವು ಯಾವುದೇ ಅಡ್ಡ ಪರಿಣಾಮಗಳನ್ನು ಮಾಡುವುದಿಲ್ಲ. ಉತ್ತಮ ಪರಿಣಾಮಗಳನ್ನು ನೀಡುತ್ತಾ ಹೋಗುತ್ತದೆ. ಯೋಗ ಅಭ್ಯಾಸ ಮಾಡಲು ಸ್ವಲ್ಪ ಸಮಯ ಮತ್ತು ಇಚ್ಛೆಯನ್ನು ರೂಢಿಸಿಕೊಂಡರೆ ಉತ್ತಮವಾದ ಮಾನಸಿಕ ಮತ್ತು ದೈಹಿಕ ಆರೋಗ್ಯವನ್ನು ಕಾಪಾಡಿಕೊಳ್ಳಬಹುದಾಗಿದೆ.

• ಮನೋಜ್ ಎಂ
ಅಪ್ರೆಂಟಿಸ್, ವಾರ್ತಾ ಇಲಾಖೆ

==

*“ಮಹಿಳಾ ಸಬಲೀಕರಣಕ್ಕಾಗಿ ಯೋಗ”*

   ಈ ಬಾರಿಯ ಅಂತರಾಷ್ಟ್ರೀಯ ಯೋಗ ದಿನಾಚರಣೆಯ ಧ್ಯೇಯವಾಕ್ಯ ‘ಸ್ವಯಂ ಮತ್ತು ಸಮಾಜಕ್ಕಾಗಿ ಯೋಗ’ ಎಂಬುದಾಗಿದ್ದು ಇದರ ಉದ್ದೇಶವು ಮಹಿಳೆಯರ ಯೋಗಕ್ಷೇಮವನ್ನು ಕೇಂದ್ರೀಕರಿಸುವ ಮತ್ತು ಜಾಗತಿಕ ಆರೋಗ್ಯ ಮತ್ತು ಶಾಂತಿಯನ್ನು ಉತ್ತೇಜಿಸುವುದಾಗಿದೆ.
    ಭಾರತದ ದೇಶದ ಪರಂಪರೆ, ಇತಿಹಾಸ ತನ್ನದೇ ಆದ ಸಾಂಸ್ಕøತಿಕ ಶ್ರೀಮಂತಿಕೆಯನ್ನು ಹೊಂದಿದ್ದು ಜ್ಞಾನ, ವಿಜ್ಞಾನ, ತಂತ್ರಜ್ಞಾನದ ಜೊತೆ ಪ್ರಕೃತಿಯೊಂದಿಗೆ ಮನುಷ್ಯನ ಜೀವನ ಕ್ರಮ ಹಾಗೂ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಬೇಕಾದ ಅನೇಕ ನೀತಿ ನಿಯಮಗಳನ್ನು ಹಾಕಿಕೊಟ್ಟಿದ್ದು ಅದರಲ್ಲಿ ಯೋಗ ಅತ್ಯಂತ ಮಹತ್ವವಾದ ಒಂದು ಆರೋಗ್ಯಕರ ಜೀವನ ಕ್ರಮವಾಗಿದೆ.
      ಭಾರತ ದೇಶವನ್ನು ಭರತರಾಜ ಆಳ್ವಿಕೆ ಮಾಡಿದಕ್ಕಾಗಿ ಭರತಖಂಡ, ಭಾರತ ದೇಶ ಎಂದು ನಾಮಕರಣಗೊಂಡಿದ್ದರೂ ಸಹ ನಾವು ಭಾರತ ಮಾತೆ ಎಂದು ಕರೆಯುತ್ತೇವೆ. ಈ ದೇಶದಲ್ಲಿ ಸ್ತ್ರೀಯರನ್ನು ಶಕ್ತಿಯ ಪ್ರತೀಕ ಎಂದು ಆಧ್ಯಾತ್ಮಿಕವಾಗಿ ಪೂಜಿಸಲಾಗುತ್ತದೆ. ಮಾತೃಸ್ವರೂಪ ಎಂದು ಗೌರವಿಸಲಾಗುತ್ತದೆ.
     ಮಹಿಳೆಯರ ಯೋಗಕ್ಷೇಮವನ್ನು ಕೇಂದ್ರೀಕರಿಸುವ ಮತ್ತು ಜಾಗತಿಕ ಆರೋಗ್ಯ ಮತ್ತು ಶಾಂತಿಯನ್ನು ಉತ್ತೇಜಿಸುವ ಜೊತೆಗೆ ಯೋಗವನ್ನು ವ್ಯಾಪಕ ಆಂದೋಲನ ಮೂಲಕ ಮಹಿಳೆಯರನ್ನು ಸಬಲೀಕರಗೊಳಿಸುವುದು ಈ ಬಾರಿಯ ಯೋಗ ದಿನಾಚರಣೆ ಉದ್ದೇಶವಾಗಿದೆ.
     ಮಹಿಳೆಯರಲ್ಲಿ ಕಂಡು ಬರುವ ಪಿಸಿಓಎಸ್/ಪಿಸಿಒಡಿ, ಒತ್ತಡ ನಿರ್ವಹಣೆ, ಮತ್ತು ಅವರ ವಯಸ್ಸು, ಅವರ ದೈಹಿಕ, ಮಾನಸಿಕ, ಭಾವನಾತ್ಮಕ, ಸಾಮಾಜಿಕ ಮತ್ತು ಆಧ್ಯಾತ್ಮಿಕ ಯೋಗಕ್ಷೇಮವನ್ನು ಒಳಗೊಳ್ಳುವ ಸಮಗ್ರ ಸಾಧನ ಯೋಗಾಭ್ಯಾಸ.
     ಸಶಕ್ತ ಮಹಿಳೆಯರು ಸಮಾಜದಲ್ಲಿ ಅವರ ಸಾಮಥ್ರ್ಯದ ಮೂಲಕ ಸ್ವಾವಲಂಬನೆಗಾಗಿ, ಸಮಾಜದ ಬದಲಾವಣೆಗಾಗಿ ನಾಯಕಿಯಾಗಿ, ಶಿಕ್ಷಕಿ, ವೈದ್ಯೆ, ವಕೀಲರಾದಿಯಾಗಿ ಹಲವಾರು ಕ್ಷೇತ್ರದಲ್ಲಿ ತನ್ನದೇ ಆದ ಪಾತ್ರವನ್ನು ನಿರ್ವಹಿಸುತ್ತಾಳೆ.

ಯೋಗ ದಿನಾಚರಣೆಯ ಇತಿಹಾಸ:
       ಸುಮಾರು 6000 ವರ್ಷಗಳ ಪ್ರಾಚೀನ ಆರೋಗ್ಯ ಪದ್ಧತಿಯಾದ ಯೋಗಕ್ಕೆ ಜಾಗತಿಕ ಮಾನ್ಯತೆ ನೀಡಬೇಕು ಎಂದು ವಿಶ್ವಸಂಸ್ಥೆಯಲ್ಲಿ ಭಾರತದ ಕಾಯಂ ಮಿಷನ್ 2014ರಲ್ಲಿ ಪ್ರಸ್ತಾವ ಸಲ್ಲಿಸಿತ್ತು. ಆ ಪ್ರಸ್ತಾವವನ್ನು ಪುರಸ್ಕರಿಸಿದ ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರಗಳು, ಪ್ರತಿ ವರ್ಷ ಜೂನ್ 21 ರಂದು ಅಂತರರಾಷ್ಟ್ರೀಯ ಯೋಗ ದಿನವನ್ನು ಆಚರಿಸಲು ಒಪ್ಪಿಗೆ ಸೂಚಿಸಿದ್ದವು.
      2015 ರ ಜೂನ್ 21ನೇ ದಿನವನ್ನು ಸುವರ್ಣಾಕ್ಷರದಲ್ಲಿ ಬರೆದಿಡಬೇಕಾದ ದಿನವಾಗಿದೆ. ಏಕೆಂದರೆ ಇಡೀ ವಿಶ್ವಕ್ಕೆ ನಮ್ಮ ಭಾರತ ಕೊಟ್ಟ ಅಮೂಲ್ಯ ಕೊಡುಗೆಯಾದ ಯೋಗವನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಆಚರಿಸಲು ಅವಕಾಶ ಕಲ್ಪಿಸಿದ ದಿನವಾಗಿದೆ.
      ಪತಂಜಲಿ ಯೋಗ ಭಾರತ ಕಷ್ಟೇ ಸೀಮಿತವಾಗಿಲ್ಲ. ಆಸ್ಟ್ರೇಲಿಯಾ, ಯುರೋಪ್ ಸೇರಿದಂತೆ ಸಪ್ತಸಾಗರದಾಚೆಗಿನ ಅಮೆರಿಕಾ ಸೇರಿದಂತೆ 177ಕ್ಕೂ ಹೆಚ್ಚು ದೇಶಗಳಲ್ಲಿ ಯೋಗಾಭ್ಯಾಸ ಮಾಡಲಾಗುತ್ತಿದೆ. ಭಾರತದಲ್ಲಿ ಯೋಗವನ್ನು ಕಲಿತು, ವಿದೇಶಗಳಲ್ಲಿ ಅದೆಷ್ಟೋ ಮಂದಿ ಯೋಗ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಾ ಉದ್ಯೋಗವನ್ನು ಕಂಡುಕೊಂಡಿದ್ದಾರೆ.
       ಮೊಟ್ಟ ಮೊದಲ ಅಂತಾರಾಷ್ಟ್ರೀಯ ಯೋಗ ದಿನಾಚರಣೆಯನ್ನು ಜಗತ್ತಿನ ಮೂಲೆಮೂಲೆಗಳಲ್ಲಿ ಆಚರಿಸಲಾಯ್ತು. ಭಾರತದ ಆಯುಷ್ ಸಚಿವಾಲಯದ ನೇತೃತ್ವದಲ್ಲಿ ರಾಷ್ಟ್ರ ರಾಜಧಾನಿ ದೆಹಲಿಯ ರಾಜಪಥದಲ್ಲಿ ವಿಜೃಂಭಣೆಯಿಂದ ಅಂತಾರಾಷ್ಟ್ರೀಯ ಯೋಗ ದಿನವನ್ನು ಆಚರಿಸಲಾಯಿತು. ಪ್ರಧಾನಿ ನರೇಂದ್ರ ಮೋದಿ ಹಾಗೂ ವಿಶ್ವದ 84 ರಾಷ್ಟ್ರಗಳ ಗಣ್ಯರು ಈ ಐತಿಹಾಸಿಕ ಯೋಗ ದಿನಾಚರಣೆಯಲ್ಲಿ ಭಾಗವಹಿಸಿದ್ದರು. ಅಂದು ಯೋಗದ ವಿವಿಧ ಆಸನಗಳನ್ನು ಅಭ್ಯಾಸಿಸಲಾಯಿತು.
      2015ರ ಬಳಿಕ ಪ್ರತಿ ವರ್ಷ ಜೂನ್ 21ರಂದು ವಿಶ್ವ ಯೋಗ ದಿನವನ್ನು ಆಚರಿಸುತ್ತಾ ಬರಲಾಗುತ್ತಿದೆ. ಈ ವರ್ಷ 10 ನೇ ಅಂತರಾಷ್ಟ್ರೀಯ ಯೋಗ ದಿನಾಚರಣೆಗಾಗಿ ಭಾರತ ಸೇರಿದಂತೆ ಜಗತ್ತೇ ಸಿದ್ಧವಾಗಿದೆ.
      ವರ್ಷದಲ್ಲಿ ಜೂನ್ 21 ನೇ ತಾರೀಖು ಉತ್ತರ ಗೋಳಾರ್ಧದ ಅತಿ ಉದ್ದದ ಹಾಗೂ ದಕ್ಷಿಣ ಗೋಳಾರ್ಧದ ಅತಿ ಚಿಕ್ಕ ದಿನವಾಗಿರುವುದರಿಂದ, ಈ ದಿನವನ್ನೇ ಯೋಗ ದಿನಾಚರಣೆಗೆ ಆಯ್ಕೆ ಮಾಡಲಾಗಿದೆ. ವರ್ಷದಲ್ಲಿ ಈ ದಿನ ಮಾತ್ರ ಅತಿ ಹೆಚ್ಚು ಹಗಲಿರುತ್ತದೆ. ಪ್ರತಿವರ್ಷ ಯೋಗ ದಿನಾಚರಣೆಯಂದು ಯೋಗ, ಧ್ಯಾನ, ಪ್ರಾಣಾಯಾಮ, ಸಭೆಗಳು, ಚರ್ಚೆಗಳು, ಸಾಂಸ್ಕøತಿಕ ಪ್ರದರ್ಶನಗಳು ಇತ್ಯಾದಿ ಕಾರ್ಯಕ್ರಮಗಳನ್ನು ಎಲ್ಲೆಡೆ ಆಯೋಜಿಸಲಾಗುತ್ತದೆ.

ಆರೋಗ್ಯ ಸಮತೋಲನೆ-ಮಾನಸಿಕ ನೆಮ್ಮದಿಗಾಗಿ ಯೋಗ:
ಯೋಗಾಭ್ಯಾಸದಿಂದ ಆರೋಗ್ಯಕರ ಜೀವನಶೈಲಿಯನ್ನು ಕಾಪಾಡಿಕೊಂಡು ಮತ್ತು ವೇಗದ ಜಗತ್ತಿನಲ್ಲಿ ಸಮತೋಲನವನ್ನು ಕಂಡುಕೊಳ್ಳಬಹುದಾಗಿದ್ದು ಯೋಗವು ಒತ್ತಡವನ್ನು ಕಡಿಮೆ ಮಾಡುವ, ವಿಶ್ರಾಂತಿಯನ್ನು ಉತ್ತೇಜಿಸುವ ಮತ್ತು ಯೋಗಕ್ಷೇಮವನ್ನು ಹೆಚ್ಚಿಸುವ ಸಾಮಥ್ರ್ಯವನ್ನು ಹೊಂದಿದೆ.    ಯೋಗ ಅಭ್ಯಾಸವನ್ನು ಎಲ್ಲಾ ವಯಸ್ಸಿನವರೂ ಮಾಡಬಹುದು. ವೈಯಕ್ತಿಕ ಅಗತ್ಯಗಳು ಮತ್ತು ಗುರಿಗಳಿಗೆ ತಕ್ಕಂತೆ ಮಾಡಬಹುದಾದ ಆಸನಗಳು ಇವೆ. ಯೋಗವು ಪ್ರತಿಯೊಬ್ಬರ ಜೀವನದಲ್ಲಿ ಸಮತೋಲನ ಮತ್ತು ಸಾಮರಸ್ಯದ ಭಾವನೆಯನ್ನು ಬೆಳೆಸುವ ಮೂಲಕ ದೇಹ ಮತ್ತು ಮನಸ್ಸಿನ ಮೇಲೆ ಉತ್ತಮ ಪರಿಣಾಮಗಳನ್ನು ಬೀರುತ್ತದೆ. ಶಾಂತಿ, ಸಾಮರಸ್ಯ ಉತ್ತೇಜಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

-ರಘು ಆರ್
ಅಪ್ರೆಂಟಿಸ್ ವಾರ್ತಾ ಇಲಾಖೆ

—